So'qmoqdagi odamlar

Taniqli qadimshunos hamda adib Mengziyo Safarovning "So'qmoqdagi odamlar" kitobi Seton Tompsonning "Yovvoyi yo'rg'a", Chingiz Aytmatovning "Alvido, Gulsari", Tog'ay Murodning "Ot kishnagan oqshom" qissalari singari nabotot va hayvonot olamining inja qirralarini aks ettiradi. "Ayrishox", "Ona kaklik", "Lahza", "Bedanalar" kabi qissa hamda hikoyalarida yovvoyi jonivorlaru qushlar hayotini zavq-shavq ila tasvirlagan adib o'z qahramonlari bilan izma-iz yurib, ular harakatidagi eng daqiq nuqtalarni obdan kuzatgan. Surxon vohasining boy tarixi, go'zal tabiati, yuz yil oldingi va keyingi iqlimiy tahliliga oid "Sarbasta Surxon" essesi esa ushbu asar muallifining shaxsiyati, ilmiy salohiyatiyu professional yozuvchilik mahoratidan dalolatdir. Mutolaadan so'ng O'zbekiston xalq yozuvchisi Shukur Xolmirzayev bilan Mengziyo Safarov ijodiy laboratoriyasida qandaydir o'zaro yaqinlik, ruhdoshlik, bir-biridan ijodiy o'rganishga o'xshash uyg'unlik borligiga amin bo'lasiz. Darvoqe, bu ikki do'st, zabardast ikki adib nafaqat zamondosh, balki hamfikr va hammaslak ham bo'lishgan. Asarni o'qish davomida bunga o'zingiz ham ishonch hosil qilasiz.