Imij

Mazkur kitob 2017 yilda nashr etilgan "Shaxs imiji" risolasining ikkinchi, qayta ishlangan va to'ldirilgan shaklidir. Birinchi nashr kitobxonlar nazariga tushib, iliq fikrlar bildirildi. Shu bois kitob qayta ishlanib, e'tiboringizga havola qilinmoqda. Ushbu risola o'z qiyofasiga boshqalar nigohi bilan qarashni xohlagan va imij yaratish istagida bo'lgan barcha kitobxonlarga mo'ljallangan. Imij insonni jamiyatga taqdim etadigan va o'zgalarga ta'sir o'tkazishga xizmat qiladigan vosita - ta'sir texnologiyasidir. Siz uni aslingizga mos, go'zallikka monand bir tarzda shakllantira olsangiz, har qanday maqsadga erishishda imijingizdan samarali foydalanish imkoniga ega bo'lasiz. Chunki odamlar asliyatingizga qarab emas, ular tasavvurida yaratgan qiyofangizga qarab sizga baho berishadi. Jozibador imij yaratish maqsadida bo'lsangiz, hayot tarzingizni, fe'l-atvoringizni, xulqingizni va muomalangizni "ko'zgu" ga solib, asliyatingizni go'zallashtirishga jazm qilasiz. Kitob mavzuga doir xorijiy va milliy manbalarga asoslangan hamda muallif kuzatishlariga tayangan holda yaratilgan. Eng muhimi, har bir so'z yurakdan o'tkazilib qog'ozga tushirilgan.