Ma'no ahli bilan yonma-yon

O'zbekiston Yozuvchilar uyushmasi homiyligida yangi kitob Ko'plab she'riy majmualar, dostonlar, qardosh va xorijiy xalqlar adabiyotidan qilgan tarjimalari bilan xalqimiz e'tiboriga tushgan taniqli shoir Shukur Qurbonning “Ma'no ahli bilan yonma-yon yoxud saboqlar” nomli yangi kitobi O'zbekiston Yozuvchilar uyushmasi homiyligida nashrdan chiqdi. Kitobdan shoirning ma'lum davrlarda alohida-alohida nashr bo'lgan va o'quvchilar e'tiborini qozongan “Ozod Sharafiddinov saboqlari”, “Erkin Vohidov saboqlari”, “Abdulla Oripov saboqlari”, “Rauf Parfi saboqlari”, “Tohir Malik saboqlari”, “Muhammad Yusuf saboqlari”, “Omonullo Madayev saboqlari” kabi risolalari jamlangan. Kitobni o'ziga xos adabiy memuarlar guldastasi deyish mumkin. Har bir risola markazida alohida bir shaxs, uning hayot yo'li turadi. Ma'lumki, xalqimiz e'zozlagan, adabiyot va ma'rifat ahli yaxshi biladigan, e'tirof etadigan ustozlar bosib o'tgan yo'lning o'zi bir maktab. Muallif ushbu maktab muallimlaridan olgan saboqlarini chin shogirdlik shukronasi, bir umrlik minnatdorlik ramzi o'laroq tasvirlaydi. Ustoz va shogirdlik an'anasi hech qachon eskirmaydi. Ustozga ehtirom, uning darajasi – maqomi qadim Sharqda juda baland bo'lgan. Shukur Qurbon ana shu haqiqatning eng nozik qirralarini, bu qadriyat hayotning o'zi qadar ko'hna va boqiyligini samimiy, mehr bilan ifodalaydi. – Ustoz – shogird muomalasi faqat ta'lim yoki biror-bir kasb-kor sir-asrorlarini o'rgatish-o'rganish bilan cheklanib qolmaydi, balki bu munosabat zamirida yoshlar tarbiyasi, barkamol avlodni voyaga yetkazishdek mas'uliyatli va sharafli vazifa turadi, deb yozadi taniqli adabiyotshunos Ahmad Otaboy. Shukur Qurbonning ushbu kitobi orqali siz asarlarini sevib o'qigan, yod olgan, mehringiz tushgan zotlarning shu damgacha ma'lum bo'lmagan yana qancha-qancha chin insoniy fazilatlarini ko'rasiz. Ma'no ahli bilan yonma-yon turgandek, ular bilan bir havodan nafas olayotgandek o'zingizni his qilasiz. Mana shu yakdillik, yaqinlikning o'zi bebaho, buyuk saboq. Shukur Qurbonning “Ma'no ahli bilan yonma-yon yoxud saboqlar” nomli kitobini, albatta, o'qing. A.Narzulloyev, O'zA