Muomalot masalalari

Fiqh ilmi asosan ibodat va muomalot qismlariga bo'linadi. Ko'plab kitoblarimizda ibodat va unga tegishli masalalar batafsil yoritilgan bo'lsada, muomalotga oid masalalar biroz e'tibordan qochgan. Vaholanki, muomalot ham shariatning eng ahamiyatli tarmoqlaridan biridir. Alloh taolo bandalarini ibodatlarga buyurgani kabi muomalotning ba'zi ahkomlarini bajarishga ham buyurgan. Ibodat qilish yo'l-yo'riqlarini ko'rsatganidek, muomalotda ham kerakli ko'rsatmalarni bayon qilgan. Ana shu ko'rsatmalarga asosan kishilar o'zaro oldi-berdi munosabatlarini, nima halol-u nima haromligini bilib oladilar. Shu va boshqa mulohazalarni e'tiborga olib, ushbu mavzuda mo'jaz bir kitob yozishga va unda muomalot masalalarini boshlang'ich qismidan to oxiriga qadar sodda uslubda savol-javob shaklida yoritib berishga qaror qildik. Kitobda ixtiyor qilingan savol-javob uslubida avval o'sha masalada nechta tarmoq yoki tushunchalar borligi sanab o'tiladi, keyin esa birin-ketin uning bayoni keladi. Ayrim savoldagi javob istiloxlar keltirish ko'rinishida keladi, keyingi savol-javoblarda yoki sahifa ostidagi izohlarda uning tushunchasi yoki batafsil bayoni kelgan bo'ladi. Kitobimizni «Muomalot masalalari» deb nomlab, uni silsilaviy qilishni niyat qildik.