Foten

Foten o'sha kunni yaxshi eslaydi. Ota-onasi taksida uni qishloqdan Bayrutga olib ketishardi. Aniqroq aytganda, Tallet Xayyat tumani, Televizion ko'chasiga. Mashinada radio ham yo'q. Yo'l esa tugay demas, hech kim gapirmasdi. Dengiz qa'ridagi kabi sukunat hukmron. Foten qo'rqayotgan edi. Ko'chalarida urush va portlash ovozi eshitilib turgan shahar uni qo'rqitardi. Yangi hayotida uni nimalar kutayotganidan, noma'lum kelajagidan qo'rqayotgan edi. Janubdagi tog'li qishloqdan sohilbo'yi tarafga ko'chmoqda edi. Yo'llar... Burilishlar... O'ngga... Chapga... Tog'lar va vodiylarning chiroyiga tikilib borardi. Dengiz ko'rina boshladi, cheksizdek edi go'yo. Taksi dengizga yaqinlashib borib, sohil yo'liga tushib oldi. Foten dengizni birinchi marta ko'rishi edi.