Shafqatsiz asr (I jild)

Umrini bosqinchilik va jangu jadal ortida o'tkazgan, tariximizda ijobiy bo'lmasa-da, nom qozongan Temuchin - Chingizxonning bolalik va o'spirinlik davri qiyinchilik, yo'qsillik, xoru zorlikda o'tdi. U o'sha paytlarda oddiy inson o'laroq tinch va osoyishta kun kechirishni qanchalar orzu qilgan edi. Temuchin onasi va ukalari bilan xotirjam hayot istab kimsasiz hududga bosh olib ketsa-da, ta'qibchilardan qutula olmaydi. Chekina-chekina charchagach, hujum qilish, bosqinchilik va talonchilik qilishni xor bo'lmaslik va bu dunyoda yashab qolishning yagona yo'li sifatida ko'ra boshlaydi. Ana shu kundan shakllana boshlagan dunyoning eng ulkan imperiyasi asoschisi Temuchinni keyinchalik hech kim to'xtata olmaydi! Yengilmas sarkarda va o'ta murakkab shaxs - Chingizxon haqidagi mazkur roman Isay Kalashnikovning o'n yildan ortiq davr mobaynida tarixiy faktlar va shu mavzudagi adabiyotlarni puxta o'rganishi natijasida yuzaga kelgan. Kitob shafqatsizlik asri voqealarini his qilmoq, moziy haqiqatlaridan ogoh bo'lmoqni istaganlar uchun muhim manba hisoblanadi.