Javome'ul kalim

Hadis ilmi ilmlarning eng sharaflisi, eng afzali, tolibi ilm uchun eng muhimlaridandir. Zero, u shar'iy dalillarning ikkinchi manbasi, usul va ahkomlarning asosidir. Tolibi ilmlar, islomiy ilmlarga qiziquvchilar Allohning kalomi Qur'oni Karimdan keyin e'tibor qaratishlari lozim bo'lgan ilm Rasululloh sollallohu alayhi vasallamning hadislaridir, chunki Rasululloh sollallohu alayhi vasallam «Bilib qo'yinglarki, menga Kitob bilan birga uning misli ham berildi», deb aytganlar (imom Abu Dovud va Termiziy rivoyat qilganlar). Binobarin, Qur'on bilan sunnat hujjat-dalil mezonida teng bo'lib, rushdu hidoyatning asosidir. Doktor Muhyiddin Muhammad Avvoma ushbu risolada sahih va Hasan hadislarni to'plagan bo'lib, ularning hajmi kichik, iboralari yengil, yodlash uchun osondir. Ibodat, muomala, axloq-odob, tarbiya va boshqa mavzularga oid ushbu hadislar Islomning madori bo'lgan hadislar jumlasidandir. Rasululloh sollallohu alayhi vasallamning go'zal fazilatlaridan, ijobiy sifatlaridan biri «javo-me'ul kalim» bo'lib, qisqa, lo'nda so'zlar bilan olam-olam ma'nolarni ifodalash qobiliyati edi. Ushbu to'plam ham ana shunday mo'jaz, ammo shomil ma'nolarni o'zida mujassam qilgan hadislardan iborat bo'lgani bois kitobni shunday nomladik.