Layli va Majnun

Ishq-muhabbat hamisha badiiy adabiyotning bosh mavzusi bo'lib kelgan. Bu mavzuda odamzod dastlab og'zaki termalar, xalqona qo'shiqlar, dostonlar yaratgan bo'lsa, keyinchalik qissalar, romanlar yaratilgan. Sharqda «Farhod va Shirin», «Tohir va Zuhra», «Vomiq va Uzro» kabi oshiq-ma'shuqlarning muhabbati hamon tillarda doston. «Layli va Majnun» dostoni ular orasida alohida o'rin tutadi. «Layli va Majnun» dostoni ilgari ham nasriy bayon qilingan. Biroq oldingi bayonlar dastlabki urinish bo'lgani uchun qator kamchiliklardan xoli emas. Navoiy asarlarini nasriy bayon qilish mumtoz adabiy tilni bilish barobarida badiiy puxtalikni ham talab qiladi. Vahob Rahmon nasriy bayoni asosida tuzilgan «Layli va Majnun» dostonining mazkur yangi nasriy tabdili asliyatga juda yaqinligi bilan e'tiborga molik. Umid qilamizki, mazkur yangi nasriy tabdil «Layli va Majnun» dostonidan keng kitobxonlar ommasini yana ham to'la bahramand bo'lishlarida o'ziga xos vosita vazifasini o'taydi.