Fahriddin Hayit: Tong tushlari

Har bir insonning barmog'idagi chiziqlar o'ziga xos bo'lib, bir-biriga o'xshashi uchramas ekan. Dunyoda shoirlar ham ko'p, sevib o'qiydigan, dilda takrorlab yuradigan she'rlar ham talaygina. Ular bir-biridan ayro ko'ngillarga nur kabi iliqlik olib kiradi. halovat, taskin baxsh etadi. Har bir shoirning o'z salohiyati, o'z mavzusi, o'z uslubi bor. Shu bois, so'z turfa ranglarda jilolanib, uning jozibasi qalblarni mavjlantirib turadi. She'rni o'qigan sayin o'qiging kelaveradi. Faxriddin Hayitning "Tong tushlari" nomli yangi to'plamidan joy olgan she'rlarida inson olamining turfa timsolini ruhan anglagandek bo'lasiz. Goh jo'shqin, goh hazin, goh isyonli, goh sokin hissiyotlar bilan qalb manzillariga yetasiz. Manzaralar, go'zal tashbehlar, sevgi va sog'inch, Vatan va tasavvur, ma'no va ruhiyat, hayot va erk, halovat va iztirob kabi ko'ngil kechinmalari misralarda o'z aksini topgan. Har bir she'rda shoir o'z qarashlarini, o'zi topgan yechim va xulosalarini to'la-to'kis berishga intilgan. O'zi anglagan dunyoni ko'rsatib bera olgan. O'ylaymizki, ijodkorning she'rlari Siz aziz o'quvchining ko'ngil mulkingizga aylanadi.