"Surgun"dagi sarguzashtlar

Komil Sindarovning «O'zbek detektivi» seriyasidagi kitoblari bugun o'z o'quvchisiga ega turkum asarlar sirasiga kirib ulgurdi. Yozuvchining soha vakili ekanligi aksariyat kitobxonlarga aën, bilmaganlar esa asar mutolaasidayoq muallifning sohani yaxshi bilishini anglaydi. Bu jihatni ta'kidlashimizning sababi aynan shu nuqta muallif asarlarining muvaffaqiyat garovidir. Yozuvchi qalamga olgan jinoyat turi davr uchun ahamiyatsiz mavzu emas, ikkinchidan, ijtimoiy voqelik qayta takrorlanmasligi uchun mohiyatni oshkor qilish va uni bor asrori bilan ko'rsatish, so'zsiz, qo'l siltab qo'yadigan mavzu emas. Navbatdagi - mazkur o'ninchi kitobda ham muallif avvalgi qahramonlar ishtirokini ta'minlagan. Farqi - jinoyat turining boshqaligi, rakurs o'zgarganligi, yozuvchining xulosasi. Ish jarayonlari sabab tergovchi “surgun”ga uchraydi. Ammo malakali xodim ish ham, joy ham tanlamaydi. “Surgun”da ro'baro' bo'lgan murakkabliklarga o'z salohiyatiyu sinchkovligi bilan yechim topadi. «fosh etilmaydigan jinoyat bo'lmaydi, chunki jinoyatchi har qancha ustomon bo'lsa-da, albatta, bitta xato qiladi va iz qoldiradi» - tergovchi Rahmonovning kasbiy shiori qanchalik haq va hayotiy ekanligini mutolaa yakunida bilib olasiz.