Dumli odamlar

Abdulla Qahhor kamdan-kam yozuvchiga nasib bo'ladigan baxt sohibi. U allaqachonlar xalq qalbining to'ridan o'rin olgan. Respublikamizda uning nomini eshitmagan, uning kitoblari kirib bormagan bironta xonadon yo'q, desa bo'ladi. Uning asarlarini barcha yoshdagi va kasbdagi insonlar sevib o'qiydilar, qissa va romanlaridan zavq oladilar, kichkina hikoyaga olam jahon mazmun sig'dira olganiga qoyil qoladilar. "Hikoyalar xazinasi" ruknida chop etilayotgan "Dumli odamlar" hikoyalar to'plami XX asrning 1930-70-yillarida o'zbek xalqining tarixi hamda oddiy insonlarning fojialarga to'la achchiq taqdiri, o'sha davr ruhi to'g'risida tasavvur olish imkonini beradi. O'quvchi hikoyani o'qir ekan, ba'zi ayanchli hodisalardan qayg'uradi, o'sha davrga xos nohaqliklardan ranjiydi, hozirgi kunlarga shukronalar aytadi.