Tantana

«Ikki olam aro» - olam-jahon ma'noni o'ziga jo qilgan bir jumla!.. Kitobdan o'rin olgan asarlardan birining nomi shunday. Janri esa munoqasha. Mohiyatan qaralganda, xar qanday badiiy asar bahsu munozaradan iborat: muallifning o'z-o'zi bilan, atrofdagilar, voqelik bilan, zamon bilan... Muallif boshiga tushgan nogahoniy ko'rgilik asarning yaralishiga turtki bo'lgan. Biroq, mutolaa jarayonida ma'lum bo'ladiki, asar faqat ijodkorning boshiga tushgan xususiy og'riqlardangina iborat emas, balki, aniqroq ta'kidlaydigan bo'lsak, xastalangan va sog'ayish azoblarini boshidan kechirayotgan jamiyat dardi ekanligini aniq-tiniq his etasiz. “Tantana”, garchi shakl, ifoda nuqtai nazaridan munoqashadan bir muncha farqlansa-da, ruhan, mazmunan va eng muhimi, rostgo'yligi bilan unga hamohang. Har ikkala asarni ham goh ko'ksingiz, goh ko'zlaringiz jimirlay-jimirlay, zavq-shavq bilan o'qishingizga ishonamiz.