Dunyoni qutqarmagan go'zallik: esselar

Esse - aytish mumkin bo'lsa, so'nggi paytlarda kam uchrayotgan janr. Aslida yozuvchilar hayot, insoniyat, jamiyat, siyosat borasidagi xolis fikrlarini aynan shu janrda ifodalashlari osonroq. Chunki xoh, hikoya, xoh qissa, boringki, roman bo'lsin, yozuvchi o'z mahorati bilan har qanday janrni esse shaklida maromiga yetkazadi. Yosh yozuvchi Sherzod Ortiqov mazkur kitobi bilan erkin janrni yana-da erkinlikka olib chiqdi. Jahon adabiyotining zabardast vakili yoki qaysidir o'lmas asari xususidagi fikrlarini yoxud qaysidir adabiy-badiiy qahramonni o'z esselarida jonlantirdi. Andrey Bolkonskiy, Anna, Raskolnikov, Feride va hokazo - ularning bari o'z mualliflari tomonidan obdan izohlangan, ta'riflangan olam. Ammo muallif qahramonlarning kitobxonlar tomonidan ko'p va xo'b muhokama qilingan xislatlarini mutlaqo boshqa rakursdan kuzatadi. Mazkur kitob mutolaasidan keyin «Kuz simfoniyasi» orqali biroz taniganingiz- Sherzod Ortiqov nomini qaytadan kashf etishingizga aminmiz, aziz kitobxon!