Covid-19 Yoki tafakkur qiling

XXI Oxirgi yillarda eng ko'p gapirilgan, yozilgan va butun dunyoni junbishga keltirgan asrning eng katta vabosi yoki “Pandemiya” deb atalmish COVID-19 haqida ikki og'iz yozib o'tmaslik to'g'ri bo'lmasa kerak deb o'yladim. Yillar o'tib, bu boshimizdan o'tkazgan voqealar kichkina risola sifatida kelajak avlod uchun eslatma bo'lib qolsin. Shu bilan birga, risolada COVID-19 keltirib chiqargan asoratlar va undan olgan xulosalarimni ham bayon etdim. Pandemiya insoniyatning hali-hanuz juda nochor ahvolda ekanligini yana bir bor isbotlab berdi. Insoniyat «Ilm-fan cho'qqisiga yetdik» deb qanchalik da'vo qilmasin, ko'z ham ilg'amaydigan kichik bir zarra karshisida naqadar ojizligini yana bir bor o'z ko'zi bilan ko'rib, amin bo'ldi. Hali bu dunyoda ochilmagan sir-asrorlar qancha ekan, bu yolg'iz Yaratganga ayondir. Albatta, bu yerda yozilgan narsalar kaminaning shaxsiy qarashlari bo'lib, kimningdir qarashlari va fikrlariga to'g'ri kelmasligi ham mumkin. Risolada yo'l qo'yilgan xato va kamchiliklar uchun ma'zur tutib, undan biror manfaat olsangiz, o'tgan ajdodlarimiz ruhiga duoyi xayrda bo'lasiz degan umiddaman.