Qumdagi ayol

Yashash uchun kurash insonni har qanday og'ir sharoitga moslashuvchan qilib qo'yadi. Darhaqiqat, eshik tugul, biron tuynugi bo'lmagan zindonga qamalgan inson ham osongina taqdirga tan berishni istamaydi. Imkonsiz bo'lsa-da, ozodlik haqida orzu qiladi. Vaqt surati esa asirni o'zi band etilgan makonga ipsiz bog'lab qo'yadi. Eski orzular o'rniga paydo bo'lgan yangilari zindon chegarasi bilan kifoyalanadi. Turmush tarzi ham cheklangan vaziyatga moslashadi. Ilk nazarda o'ta mudhish ko'ringan, kishini erkidan ayirgan devorlar ham uning o'z uyidek qadrdon bo'lib qoladi. Yillar o'tib chiqish eshigi ochilganida esa, inson mazkur zindon endilikda o'z boshpanasiga aylanganini his etadi. O'zining "Qumdagi ayol" asari bilan muallif Kobo Abe nima demoqchi ekanligini anglash uchun, kitobxondan ziyraklik hamda teran fikrlash talab etiladi. Asar voqealari muayyan bir hududda bo'lib o'tsa-da, har bir kichik epizod qatida ma'lum bir ma'no pinhon yotadi. Umid qilamizki, kitob ana shu xususiyati bilan o'z o'quvchilariga munosib xayoliy hamroh bo'la oladi.