O'tkan kunlar» (kirill va mumtoz arab alifbosida)

Yaxshi kitobni takror-takror o'qiganimizda har gal yangi-yangi ma'nolarini kashf etamiz. Zamonlar kechgan sayin turli ijtimoiy muhit va siyosiy tuzumda ham chaqnab turuvchi, har gal o'quvchida yangi-yangi fikr uyg'otuvchi asarlar chinakam durdona sanaladi. Abdulla Qodiriyning «O'tkan kunlar» ro'moni ana shunday kitoblar sirasiga kiradi. «O'tkan kunlar» ilk bor nashr etilgan vaqtda Turkiston xalqlari faqat diniy kitoblar va dostonlarni, yana bir qism odamlar esa sho'rolarning kundalik gazetalarini o'qib kifoyalanar edi. Ro'mon degan kitobni rus tilidan xabardor ayrim o'zbek ziyolilari rus adabiyotidan o'qib zavq olgan bo'lsalarda, lekin oddiy xalq bu janrdan bexabar, bebahra edi. «O'tkan kunlar» 1925 va 1926 yillarda uch bo'limi alohida kitob holida 10 000 nusxadan chop etiladi. U sekin-asta xalq orasiga kirib boradi. Aytishlaricha, besh-o'n yil davomida ro'mon shunday dovruq soladiki, Turkistonning uzoq-uzoq viloyatlarida yashovchi odamlar o'zaro pul yig'ib, «Kumushbibining kitobi»ni (o'sha vaqtdagi odamlarning iborasi) topib olib kelish uchun Toshkentga chopar jo'natar ekanlar. Yana xotiralarda yozilishicha, Toshkentda, boshqa shaharlarda va qishloqlarning choyxonalarida, xonadonlarda guruh-guruh odamlar bir odamga bu kitobni o'qitib, tinglab zavq olishar ekan. Siz ham qo'lingizdagi «O'tkan kunlar» ro'monini o'qib, betakror til, maroqli uslub, tarixiy manzaralar, yuksak ma'naviyat, muomala madaniyatidan bahramand bo'lasiz, degan umiddamiz.