Garashalik ko'ngil

Ko'zmunchoq! Tilimizda shunday samimiy so'z bor. Ota-bobolarimizning ko'zga yaqin, kelishgan farzand-u nabiralariga qarata aytiladigan “Ko'z tegmasin” iborasini ko'p eshitganmiz. Ehtimol, shu so'zdan ilhomlanib O'zbekiston xalq shoiri Sirojiddin Sayyid ham kitoblaridan birini “So'zmunchoq” deb nomlagandir. Adabiyotimizda ham ana shunday o'sib kelayotgan ko'rkam nihollarning bo'qqa aylangulik bo'yi bor. Bu bog'larning hosili mo'l bo'lishini niyat qilib, bir turkum kitoblarni “So'zmunchoq” rukni ostida nashr etishni reja qildik. Iroda Umarovaning yozganlari samimiyligi, rostligi bilan dilga yaqin. She'rlarida turfa gullarning iforini tuygandek bo'lasiz, u xoh o'zi aytmoqchi, sabrguli bo'lsin, xoh tikanli atirgul. Iroda ana shunday ko'nglini gulga o'rab kelayotgan yoshlardan. Ayniqsa, ota yurt, ona tuproqqa bo'lgan mehrning tafti sizni Qarashning so'lim bog'lariga, sohir so'qmoqlariga eltadi. Shu bois, o'qib yodingizda qolsa, qalbingizga bir qatra nur kirsa, buni shoiraning ulg'ayib borayotgan she'rlaridan deb biling.