Fiqhiy yo'nalish va kitoblar

Fiqh va fiqhiy mazhablar hamda bu borada yozilgan kitoblar haqida so'z borar ekan, biz uchun hanafaiy mazhabi alohida ahamiyat kasb etadi. Chunki bizning vatanimiz qadimdan hanafiylik tarqalgan, o'ziga xos nufuzga ega bo'lgan va shunday bo'lib kelayotgan o'lkadir. Vatanimizdan ko'plab faqihlar chiqqan va fiqhning barcha yo'nalishlari bo'yicha barchaning tahsiniga sazovor bo'lgan kitoblar bitilgan. Shuning uchun ham hanafiy fiqhi kitoblari va ularning martabalariga oid ma'lumotlarni taqdim qilishga alohida ahamiyat berdik. Kitobimizda hanafiy mazhabidagi kitoblarning martabalari va ularning darajalari haqida ham maqola keltirdik. Hanafiy kitoblar ichida ulug' vatandoshimiz Burhoniddin Marg'iloniy rahmatullohi alayhining “Hidoya”si alohida e'tiborga sazovorligi bois “Hidoya”ning ilmiy va nazariy ahamiyati hamda uning o'ziga xos xususiyati» nomli maqolani ham taqdim etdik. Albatta, fiqhiy asarlar haqidagi ma'lumotlar bugungi kunimizda yozilgan kitoblar to'g'risidagi bilimsiz to'liq bo'lmasligi aniq. Shuning uchun ham «Hozirda yozilayotgan fiqhiy kitoblar» sarlavhasi ostida «Mavsu'atul fiqhil islamiy», «Al-mavsu'a al-fiqhiyya», «Majmu'atu al-fataviy ash-shar'iyya», “Fiqhus-sunna”, «Al-fiqhul islamiyyu va adillatuhu», “E'lous-sunan”, «Al-fiqhul Hanafiyyu va adillatuhu», «Al-Muomalot al-moliya» kabi kitoblar haqida ham imkon qadar so'z yuritdik. So'ng umumiy fiqhiy istilohlarga, hanafiy mazhabining ba'zi istilohlariga, ibodatdagi istilohlarga va boshqa ma'lumotlarni taqdim qilishga o'tildi. Xulosa qilib aytadigan bo'lsak, ushbu kitobni diqqat bilan o'qigan har bir shaxs juda ko'p kerakli ma'lumotlar bilan oshno bo'ladi, degan umiddamiz. Shayx Muhammad Sodiq Muhammad Yusuf