Sab'ai sayyor

Alisher Navoiyning «Sab'ai sayyor» dostoniga qadimiy Eron shohi Bahrom Go'r bilan borliq afsonalar asos qilib olingan. Xamsanavis salaflaridan farqli ravishda Navoiy bu mashhur mavzudan o'zining ilg'or g'oyalarini ifoda etish maqsadida foydalanib, qoliplovchi hikoyaga kirgan novellalarni ixchamlashtirib, mazmun va shakl jihatidan mukammal asar yaratgan. Navoiy dostonining yana bir muhim jihati shundaki, shoir asarining zaminiga insonning haqiqiy sevgisini asos qilib oladi. Ulug' insoniy sevgi vositasida Navoiy davlat, ijtimoiy, axloqiy-etik va boshqa masalalarni ko'tarib chiqib, dostondagi asosiy mavzuni bayon qilish jarayonida ularni ham ketma-ket hal qilib beradi. Muhtaram kitobxon! Mutafakkir shoirning shoh asarlaridan biri «Sab'ai sayyor» shu paytgacha to'la nasriy bayon qilinmagandi. Dostonning oldingi barcha nashrlarida qariyb yuzga yaqin bayt nasriy bayon qilinmagan holda chop etilgan. Nihoyat, Inoyat Maxsumning bayoni asosida mazkur dostonning to'liq nasriy bayoni sizning hukmingizga havola qilinmoqda.