Qadr kechasidagi qotillik

Qadr-qimmat, hurmat, o'zaro mehr-oqibat tushunchalari, avvalo, ijtimoiy sog'lom muhitda shakllanadi. Bu muhit sog'lom bo'lmas ekan, qadr-qimmat toptaladi, odob-axloq me'yorlariga putur yetadi, umuminsoniy tuyg'ular zavol topadi. Detektiv ixlosmandlarining sevimli yozuvchisiga aylangan Komil Sindarovning yangi - «Qadr kechasidagi qotillik» nomli asari ayni mulohazalar xususida so'zlaydi. To'g'ri, asar mutolaasini boshlar ekansiz, sirli qotillik yuz bergani, qotillarning izsiz g'oyib bo'lgani, chigal vaziyatlaru kulminatsion nuqtalar va kutilmagan yechim kitobxon fikru hayolini band etadi, asarni bir nafasda o'qib chiqishiga xizmat qiladi. Ammo zukko kitobxon mutolaa so'ngida asar nima sababdan yozildi va qanday maqsadda o'quvchiga yetkazildi, degan savol ustida biroz bosh qotiradi.