Zamona zayli

Yoz kunlaridan biri. Grachi qishlog'idagi o'rtahol boyvuchcha Anna Pavlovna Aduyeva xonadonida yashovchi jami tirik jon bekaning o'zidan tortib zanjirdagi iti Barbosgacha tong yorishgandanoq oyoqqa qalqqan. Faqat Anna Pavlovnaning arzanda o'g'li Aleksand Fyodorichgina yigirma yoshli yigit uyqusi bilan dong qotib yotardi. Qolganlar tinim bilmay kuymanishmoqda. Ular yosh barin uyg'onib ketmasligi uchun oyoq uchidagina odimlashar, pichirlashib gapirishardi. Hozirgi kuydi-pishdining sababi shuki, Anna Pavlovna o'g'lini Peterburg xizmatiga yoki uning tili bilan aytganda, odamlarni ko'rish va o'zini ko'rsatishga jo'natayotgandi.