Men - Maryam

“Men Maryam” asari hayotiy voqealar asosida yozilgan bo'lib, ayol taqdiri, jamiyat bosimi va orzular yo'lidagi kurashni chuqur psixologik ruhda yoritadi. Asar olis bir qishloqda, ilmdan yiroq, qadriyatlari tor doiradan chiqmagan oilada tug'ilgan Maryamning hayoti bilan boshlanadi. Qiz farzand tug'ilgani uchun g'ururi poymol bo'lgandek his qilgan ota nafaqat qizining kelajagi, balki unga ism qo'yishni ham o'ziga munosib bilmaydi. Ana shu beparvolik, sovuqqonlik va jamiyat qarashlari Maryamning butun umriga soya soladi. Ammo qishloq tutumlaridan boshqa “haqiqat”ni tan olmaydigan muhitda ulg'aygan qiz qalbida ilmga, o'qishga bo'lgan ishtiyoq qanday paydo bo'ladi? U orzulari sari intilish uchun nimalardan voz kechadi, nimalarga dosh beradi? Asar davomida o'quvchi Maryamning orzulariga, umidlariga va iztiroblariga sherik bo'ladi. Uning ichki kechinmalari, sukut ortidagi faryodi, jamiyat va taqdir bilan kurashi har bir sahifada ta'sirli tarzda ochib beriladi. Bu asar ayolning nafaqat zaifligi, balki sabri, irodasi va ichki kuchini ham namoyon etadi. Savollar ko'p: — Ayolning orzulari nega ko'pincha qurbon bo'ladi? — Ilm va erkinlikka intilish gunohmi? — Sabr najotmi yoki majburiyat? Bu savollarning javobini esa o'quvchi kitob sahifalaridan topadi.