Qalbingiz sof bo'lsa, hikoyangiz baxtli yakunlanar

Hech qanday uchrashuv tasodifiy emas. Xuddi hozir bu satrlarni o'qiyotganingiz bejiz bo'lmaganidek, Afrikaga borganim va u yerda bir sufiy bilan uchrashib, undan o'rganganlarimni shu kitobda jamlaganim ham bejiz emas. Sufiylar: "Dardlar insonni olg'a intilishga undaydi", - deydilar. Eng muhimi, olg'a intilishdan voz kechmaslikdir. Bu esa yo'lga chiqqanlar uchun "umid bor" degan ma'noni anglatadi. Chunki taqdir har lahza qayta-qayta yoziladi. Siz kim bilan uchrashishingizni yoki nima topishingizni hech qachon bila olmaysiz. Ba'zida istagan narsangizni qidirib ham topa olmaysiz, lekin kimki istaganini topgan bo'lsa, demak, u izlagan. Mavlono aytganidek: "Yo'lga chiqsang, manzil ko'rinadi". Ushbu kitobga yo'limda menga hamrohlik qilgan ustozlarimdan ilhomlanib sufiy ahlining dardlardan qutulish, o'zaro munosabatlardagi muammolarini hal etish, hayotga yana-da ijobiy munosabatda bo'lish uchun qo'llagan amaliy usullarini kiritdim. Kitobdagi nasihat-u ko'nikmalar bugungi kungacha minglab odamlarga yordam bergan va sizga ham yordam berishiga ishonaman. Shuni esdan chiqarmang, hamrohim: necha yoshda bo'lishingizdan, boshingizdan nimalar kechirganingizdan qat'iy nazar, qalbingiz sof bo'lsa, hikoyangiz baxtli yakunlanadi. Turk tilidan Abduvosilova Muqaddas va Ergashboy Matyoqubov tarjimasi