Buvayda shevasidan ixcham lug'at

Ushbu lug'at tumandagi barcha qishloqlarning dialektal xususiyatlarini qamrab olgan emas. Kitobda Buvayda, Bachqir, Oqqo'rg'on, Yangiqo'rg'on, Jiydali, Jalayer va Ing'irchoq qishloqlarida faol qo'llaniladigan dialektal birliklar, iboralar va maqol-matallar jamlangan. Adabiy tildagi so'zlarning shevadagi fonetik variantlaridan ayrimlari namuna sifatida olindi. Buvayda tumanining dialektal va etnografik xususiyatlarini to'liq o'rganish uchun alohida ilmiy-amaliy tadqiqotga ehtiyoj borligi ma'lum. Yirik tilshunos olim Nizomiddin Mahmudov shevalar tadqiqining ahamiyatini shunday ta'kidlaydi: "Xalq tilining hududiy namunalari bo'lmish shevalar benihoya nodir boylik, ular adabiy tilimizning asosiy boyish manbalaridan biridir. Shevalarga oid so'zlarni to'plash, chuqur o'rganish, lisoniy-tarixiy jihatdan tavsiflash til va xalqning murakkab tarixini tadqiq etishda muhim omillardan hisoblanadi".