Qo'rqut ota kitobi: Doston

"Qo'rqut ota kitobi" - turkiy xalqlarning eng qadimiy dostonlaridan biri bo'lib, mifopoetik asoslari uch ming yillik qadimiy tasavvurlarga borib taqaladi. Dostonlarda turkiy qavmlarning davlat va saltanat tiklash yo'lidagi kurashlari, ijtimoiy hayoti, urf-odat va dunyoqarashi ramziy tarzda ifoda etilgan. Mifologik jihatdan "Qo'rqut ota kitobi" "Go'ro'g'li" dostonlari turkumining yakuniy bosqichi sanaladi. Har bir rivoyatda xalq donishmandi Qo'rqut ota sahnaga chiqib, voqealarni umumlashtiruvchi hikmat va nasihatlar aytadi. Dostonning yozma nusxalari XIV-XVI asrlarga oiddir. XIX asr boshida Germaniyada orientalist H. F. von Dis tomonidan dostonning ayrim qismlari tarjima qilinib chop etilishi bilan jahon ilmiy jamoatchiligi e'tiborini tortdi. Undagi qadimiy miflar va ramziy obrazlar butun dunyoda katta shov-shuv ko'targan, natijada doston turkiy xalqlar merosidan tashqari, umuminsoniy tafakkur xazinasining muhim bo'lagi sifatida YUNESKOning nomoddiy madaniy merosi ro'yxatiga kiritilgan.