Eng sara muhabbat qissalari

Muhabbat ne qudratki, inson qalbida ana shu tilsimli olamga ehtiyoj, intilish bor? Unda ne qudrat yashirinki, urib turgan yurak o'zga bir qalb tomon hamisha ilhaq bo'laveradi, yuragi sog'inch azobi bilan o'rtanaveradi? Bu savolga dunyoda qancha odam istiqomat qilsa, xuddi shuncha javob bor, ya'ni har bir inson yuragida gohida oshkor, gohida pinhon muhabbat yashaydi. Darhaqiqat, Dunyo muhabbatdan paydo bo'ldi. Muhabbat tiriklik ustuni bo'ldi. Muhabbat shaxslarni kamolga yetkazdi. Muhabbat ma'nan komil insonni tarbiyaladi. Muhabbat odam bolasiga o'zini tanitdi. Muhabbat hayratlar, azoblar, og'riqlar, dardlar, qayg'ular bilan keldi. Va inson farzandi uni shu holida quvonch bilan qabul qildi, og'ir damlarida undan panoh istadi. E'tiboringizga havola etilayotgan kitobga biz o'lmas va abadiy mavzu - muhabbat eng sara qissalarni jamladik. To'plam yuragingiz qatidagi yechimi yo'q savollarga javob berolsa, nelarnidir yodingizga solsa, qalbingizda mudrab turgan tuyg'uni qayta hayajonlantirsa va uni o'qishga yana ehtiyoj sezsangiz, biz o'z maqsadimizga erishgan hisoblaymiz o'zimizni. To'plovchi: Ma'mura Qutliyeva